السويس /محمد عليان #

سؤال مستفز؟ جايز ... بس أنا والله بسأل بجد ... مش هزار ولا تريقة ماهو احنا فعلاً مش عارفين يعني إيه "مصر"، فمش عجيب نلاقي فينا اللي مش عارف يحبها واللي زهقان منها واللي عايز يطفش ويسيب أرضها ... وأول ماحد يتكلم معاه يشتمها ويسبها وينهش في عرضها الاسم لوحده له معاني كتير ... وعلشان أبقى بتكلم بجد ... ححاول أنَظَره "من تنظير يعني"، فلو حافكر تفكير منطقي عادي جداً ... ايه العناصر اللي ممكن اللي ممكن يبقى فيها إجابة السؤال المستفز ده؟ ولقيت ان ممكن أي حد لما يفكر تفكير يروح لــلعناصر دي (بدون ترتيب - الأسماء المذكورة مجرد أمثلة):

 

1- مصر في القرآن والسنة (والكتب السماوية الأخرى إن أمكن)ـ 

2- مصر المكان: الجغرافيا ... المعالم ... عبقرية المكان ... وما إلى ذلك

3-مصر الناس: أى كلام بقى بيتقال عن طيبة شعبها وكرم أخلاقهم (يعني لو حقيقي) ... وكمان لو معنى البلد في ذهن أي حد ارتبط (سلباً أو إيجاباً) برموز شخصية فى أي مجال ... جمال عبد الناصر في السياسة ... طلعت حرب في الاقتصاد ... نجيب محفوظ في الأدب ... أحمد زويل أو فاروق الباز في العلوم ... يوسف شاهين في الفن 

4- مصر التاريخ: أحداث التاريخ ... انتصارات ... انكسارات 

5- مصر فى الفن: أفلام ... أغاني ... مسلسلات ... أشعار ... لوحات وصور 

6- مصر في الكتابات المختلفة: مؤرخين ... علماء ... أدباء

 

وعناصر تانية كتير ممكن يبقى فيها الإجابة.

 

بس مثلاً، لو بدأنا بالأساس الديني، فيكفي أن نعرف أن: 

 

"ذكرت مصر فى القرآن في أكثر من ثلاثين موضعاً (بشكل صريح أو كناية) وكذلك نقل عن السيوطي عن الكندي تعليقه على طائفة من آيات القرآن قائلاً : لا يعلم بلد في أقطار الأرض أثنى الله عليه في القرآن بمثل هذا الثناء، ولا وصفه بمثل هذا الوصف، ولا شهد له بالكرم غير مصر" ، من كتاب مصر في القرآن والسنة، للدكتور أحمد عبد الحميد يوسف، دار الشروق، القاهرة، سنة 1999

 

وبالرجوع لتفسير ابن كثير أيضاً، حنلاقي ان "مصر" تم الإشارة إليها في خمس مواضع بلفظ "الأرض" ... وهو ما اعتبره ابن كثير "باعتبار أن مصر كانت تعدل الأرض كلها في ذلك الوقت"

 

ومعلومة تانية مهمة، وهي أن مقولة "مصر أم الدنيا" ... اللي بنرددها من غير ما نعرف معناها، وللأسف برده ناس بتستخدمها سخرية وتريقة ليها أساس ديني وتاريخي ... وهو أن مصر سميت أم الدنيا نسبةً إلى السيدة هاجر (زوجة سيدنا إبراهيم) والتي كانت من مصر وبعدها إنتقلا سوياً إلى شبه الجزيرة العربية التي لم يسكن بها بشر قبل ذلك، وبالتالي فإن السيدة هاجر "المصرية" هي أم العرب. كما أن مصر سميت نسبة إلى "مصرائيم" ابن حام ابن سيدنا نوح، كما أن الجنس الحامي هو أول من سكن مصر بعد الطوفان، ويروى عن عبد الله بن عباس قال: "دعا نوح عليه السلام ربه، لولده: اللهم بارك فيه وفي ذريته وأسكنه الأرض المباركة التي هي أم البلاد وغوث العباد ..."

عرفتم يعني ايه مصر ........

 

محمد عطية عليان