كتب: محمدرجب ****

أعرب حسنى عبد ربه، قائد الإسماعيلى، عن غضبه الشديد من تصريحات أحمد حسام ميدو المدير الفنى للفريق، التى أكد فيها أنه لن يستمر فى قيادة الدراويش، فى حالة وجود "القيصر"، قائلاً: "لو أنت ميدو أنا حسنى عبد ربه، والإسماعيلية كلها تعرف مين هو حسنى، ومين ميدو".

وقال حسنى خلال تصريحاته للإعلامى مدحت شلبى، عبر شاشة "TEN": "ياااه هى الكورة وصلت لكدة، والله والله أنا ممكن يحصلى حاجة من الكلام اللى سمعته من ميدو، مش أنا اللى يحصل معايا كدة يا جماعة، وأنا مستغرب إنه يقول إن أنا اللى أعمل عليه مؤامرة، ده أنا كنت أول واحد داعم له، وواقف جنبه".

وأضاف القيصر: "النهاردة لما أخويا يزعل علشان أخوه طلع من الملعب، واتخانقت مع أخويا بسبب ميدو، ولقيت ميدو بيكلمنى وعمال يشتم فى أمى وأهلى، وأنا اعتذرله، وأقوله طيب اكبرلى، يقولى لا أنت مبتكبرليش، وزى ما هو بيخير الحج محمد والإدارة، أحب أقوله إن كنت أنت ميدو فأنا حسنى عبد ربه، والنادى ده اللى اخترته وضحيت بملايين الدنيا علشانه".

وتابع: "مهما قلت ومهما عدت، أنا هفضل فى الإسماعيلى غصب عنك، ولو هشتغل بواب فيه ده بيتى، ووالله والله ولا أنت ولا الجن الأزرق هيعرف يخرجنى من بيتى، وأنا احترمتك ولسة بحترمك، بس مش حسنى عبد ربه اللى يعمل مؤامرة على ناديه".