عامل عمايل سودة.. داير ولا ف بالك
فاقد بتتسرمح.. وتبعتر أموالك
فرحانلي باللمة.. ولا واعي لأعمالك
آدي الصحاب غدروا.. عاجبك ياواد حالك؟

عايش في حزن وهم.. والكل راح سابك
الشهد طعمه سم.. من فعلة أحبابك
مدفون في عيشة تغم.. ماهو أصل ده منابك
ماتداري خيبتك وإتلم.. خليك في سردابك

عقلك ياولدي صغير.. هايف ولا بتفهم
ماكان معاك المال.. دلوقتي جاي تندم!
أبوك بنالك دنيا.. مقالكاش إهدم
عشانك حفر في الصخر.. تقوم ياواد تردم؟!
أديك فرحت يومين.. خلاص بقى إكتم

أديك فرحت يومين.. ليه جاي عاد تشكي؟!
خلاص ياسبع بقيت.. زي الحريم تبكي؟
لم اللي باقي وغور.. دور على كرامتك
وإن حد قال: مالك؟.. أرجوك بلاش تحكي...