بقلم ...مصطفي رمضان *
مصــــر
مصر هتبقي أحلا لو بقلوبنا نفديها
المولا هيقف جنبنا وينصرها على من يعاديها
في القرآن ذكرها مين غيره هو اللي حميها
بس إحنا نديها حقها ونحبها ونراعيها
وضمايرنا اللي ماتت جوانا عايزين بقا نحييها
أزاي بتقول أمنا وإحنا مش بنخاف عليها
حبك مش تحية علم ترفع أيدك وتحييها
لو فعلاً بنحبها يبقي الواسطة لازم من القاموس نلغيها
ومش كل حاجة بالرشوة نسميها هدية ونمشيها
وأصحاب المناصب تشتغل وتقوم من على كرسيها
وتحلل لقمتها شوية بدل ما هي قاعدة ولازقة فيها
وكفاية استغلال لبعض وكل حاجة نغليها
حتى الورقة الصغيرة بلاش في الشارع نرميها
عايزنها تبقي أحلا وإحنا اللي نحافظ عليها
وعلمائنا المبتكرين لازم ناخد بأيديها
نحتضنهم ونساعدهم قبل ما يطفشوا منيها
ونكون كلنا أيد واحدة وبلدنا من تانى نبنيها
دى أغني دول العالم وكل الخير مليها
بس عايز عدالة اجتماعية علشان أحلي الثمار نجنيها
والحاكم يبقي عادل ميكونش حاميها حراميها
وبكدا بلدنا هتبقي أحلي وفوق في السما نعليها